قانون الرسوم الجديد ........... أه يا أمه أه و أه يا ابا ....

المكان ........

 بهو محكمة ما  في أحد  مدن جمهورية مصر العربية 

  الساعة الحادية عشر ظهرا

أحد المواطنين مصدوم فاتحا فاه ...  وعيناه  تكادان تقعان ارضا...بعد  دقائق أفاق وبدأ يتمتم كالمجنون :-

يا لهوي ( الكلام للرجل ) يا خرابي ....  جبتك يا عبد المعين تنصفني لقيتك مفتري وظالم وبتطحني .....  أنا أكلت ايه عشان اشرب عليه ميه ..  يا دولة ظالمة ... أروح لمين ياخدلي حقي؟  ...  انت المنتقم يارب ...  ماتهديهمش لا هدهم يااااارب واخسف بيهم الارض ... خدهم اخد عزيز مقتدر يارب بظلمهم ولع فيهم .........

- بصراحة المنظر شدني  .. قربت من الراجل شبه المجنون ده مظهره يوحي بانه رجل محترم – لا بيهش ولا بينش – وزاد داخلي الفضول – حكم المهنة –

وسالت نفسي سرا :

يا تري يا عم الحاج إيه اللي طير عقلك ...أنا عارفة ان اللي يدخل المحكمة لازم يأمن علي عقله واهي فرصة شركات التأمين تعمل شغل

بصراحة حسيت اني عاوزة اضحك.... جيت اضحك حسيت بغصة ومرارة وألم   من حال الرجل .... وقعدت افكر اروح اساله مااروحشي ؟ شكله وتخاريفه زادوا الفضول جوايا ...

  المهم من غير ما  اطول عليكم – بس وحياتي ماتحلفونيش اني اطول -   حطيت ايدي علي كتفة :- 

سلامتك يا عم الحاج ..  خير فيه حاجة ضايعة منك؟؟؟؟؟؟؟؟

استدار ليواجهني وليته ما استدار  .. الألم ممزوج بالذعر والقهر والحزن والهلع مشاعر مختلطة ادمت قلبي وكانه خرج من فيلم رعب  ....

هو رجل في العقد السادس دموعه تملاء عيونه .... وفوجئت به تنسال دموعه كالاطفال  فاخذت بيده وانتحينا جانبا في غرفة المحامين وطلبت له شاي ...... وسألته وفضولي تحول الم لمظهرة الذي يرثي له :-

فيه ايه يا حجيج مالك .....  بشويش علي نفسك كله يهون وان شاء الله كل شئ له حل

- يهون ازاي يا استاذة ؟؟

- طيب فيه ايه احكيلي وان شاء الله خير

- ياااااارب ... انت القوي علي كل ظالم ......أأقولك ايه يا بنتي  ... أنا موظف حكومي عندي 58 سنة وعندي ثلاث اولاد في مراحل التعليم المختلفة .. قلت في يوم كلمة حق في وجه ظالم ..بعت فيه شكاوي وبهدلني وسبني علنا وفي شكاوي رسمية وعملي محاضر و التحقيقات اثبتت براءتي تماما واثبت التحقيق تجاوزاته ومع ذلك اتحفظت الشكاوي ... فلجأت للمحكمة اطلب حقي بالتعويض عن الايام السوده اللي عشتها بسببه انا واولادي ...  كان لازم  اعمل كده ده وراني الويل .. رفعت دعوي تعويض القاضي حجزها للحكم في تاني جلسة .. قلت يا كريم يارب  فرجكك قريب ....  لكن  في الحكم رفضت المحكمة دعوتي   وقالولي المحامين ده اتجاة عام رفض القضايا لان الشكوي حق مكفول للجميع .... 

يعني يطلع عين اللي خلفوني ويبهدلني وتثبت براءتي وماليش حق اخد حقي لان الشكوي حق مكفول للجميع ..... يا لهوي طب الشكوي الكيديه ايه عقابها ؟....  قالولي استأنف ....  قلت  لما اسال فعرفت ان القانون الجديد رفع الرسوم بيني وبينك قلت الـ200 او الـ 300 جنيه الولاد اولي بيهم وعوضي علي الله وحسبي الله ونعم الوكيل ورفضت استأنف ...وبعد  اسبوع من ميعاد الاستئناف لقيت محضر محكمة جاي وجايبلي اعلان من المحكمة بفرق رسم !!!!!!!!! 

- خير يا سيدنا ؟

- عليك فرق رسم للمحكمة

- ليه ؟ وبتاع ايه ؟

- عشان دعوي التعويض بتاعتك اللي اخدت رفض

- طيب ما هي خدت رفض وانا لا أخدت أبيض ولا أسود 

- مسح راسه القرعه وقالي بعد مانفخ خدوده ورجع للوراء :-

             قانون الرسوم الجديد يا سيدنا بيعتبر الرفض للدعوي زي خسرانك للقضية وينحسب عليك فرق رسم نسبي وخدمات طبعا انت مش فاهم حاجة باختصار علي كل 1000 جنيه حتدفع حوالي 70 جنيه فرق رسم نسبي وخدمات لانك خسرت دعواك – حسيت انه يقصديقولي عشان تحرم يا مواطن يا  متعوس تقول حقي لازم تتعلم تبلع لسانك جتك قطعه ولا تقولي حق ولا باطل – هو قالي علي الرسم وانا شفت النجوم في عز الظهر   ... ياااااااالهووووووووووي...... ده انا رفعت الدعوي بـ 600000 الف جنيه..... قلت ابحبح والمحكمة تحكم براحتها.... يعني ح ادفع كام ؟!!!!..... يا خرابي حوالي 40000  الف جنيه..... ده انا لو معايا المبلغ ده كنت قدمت استقاله ...... انا جيت اقول انجدوني وهاتولي حقي لقيتكم بتفرموني وتطحنوا عظمي ......  أجيب منين   ........ أروح فين واجي منين دليني يا استاذة  ينوبك ثواب ؟؟؟

- المرة دي بقي الدور عليه انا اتصدم ..... أأقوله ايه -  الكلام ده بيني وبين نفسسي – أدلك طيب ازاي  ده انا لو شرحت لك الوضع ممكن تموت فيها  ..... أأقولك إيه ...... يا عم الحاج ده انت قدامك حلول احلاها علقم 

 إما تدفع خلال ثمانية ايام وفي الحالة دي بيعتبروها مصالحة وتدفع ثلثي المبلغ فقط .......أو تقسط .......وابقي قابلني لو سددت لانه بظروفك دي مش حتدفع....... والمحضرين يبهدلوك تبديدات........ والسجن مستنيك تاكل وتشرب وتلبس ببلاش...... وعيالك يموتوا ضياع .......وكرامتك مش بس تنهان.......لا دي ح تنداس...... ولقيتني وانا بافكر في سري باقول لنفسي : يا لهوي ده أنا اللي ح اقول بالهوي بجد ...... ده انت قهرتني يا عم الحاج ...... أأقولك ايه بس ؟!!!!!

ولقيتني باسالة :-

تقدر تدفع حاجة من الفلوس دس ؟

- ابتسم قهر وبمرارة رد :

منين ما انتي عارفة البير وغطاه كل الموظفين في الهوا وحباله الدايبة متعلقين

- طيب مفيش غير حل واحد......... تقدم تظلم من الرسوم لرئيس القلم.... وهو ح يعرضه علي رئيس المحكمة ......ويحدد له جلسة وانت وبختك وحكم القاضي مفيش غير كده وهو ده الحل العلقم

سكت..... وسكت.... وسكت وقالي:- 

الله المستعان وقام ومشي وهو بيقول حسبي الله ونعم الوكيل

 وقعدت لوحدي ااقول في سري :-

يالهوي يا خراب بيتك يا اللي تقول حقي وكرامتي ............. حقكك ؟- جاك كسر حقكك ........

وافتكرت اغنية أه يا أمه أه وأه يا ابه ده قانون ...................؟ 

وسلملي علي قانون الخراب الجديد

عفوا

قانون الرسوم الجديد