انتشر جروب كلنا خالد سعيد علي الفيس بوك بسرعة البرق ياتري ليه
- هل لان خالد شاب زيهم ( ما اظنش )
- ياتري الكبت ولد الانفجار جواهم ( احتمال )
- احنا خلاص زهقنا فعلا والخوف مبقاش المسيطر علينا ودلوقت بنتصرف بيأس يا تصيب يا تخيب ( هو ده الاحتمال الارجح )
- ايه اللي بيحصل حاجات كتير بتحصل بس ياتري ح يكملوا والا الموضوع شويه وينام كالعادة
اعتقد شويه وينام ما كتير جرايم زي دي مرت ونامت
لا حول ولا قوة الا بالله ......
ايه اللي بيحصل واخدين البلد دي علي فين .... حرام بقي ....
كل اللي فات ده قليل من كثير بيدور داخل عقول كتير من المصريين سواء شباب او شيوخ والمصيبة حتي الاطفال عارفين وفاهمين والحمد لله رافضين سياسة القهر والاذلال
حقيقي لما بشوف صورة خالد مع اني ما اعرفوش باحس بالم ودموعي بتغلبني مهما كان الفيديو اللي كان معاه مهما اظهر من فساد شرطتنا .. يستحق عليه خالد الموت ؟!!!!!! دي روح ونفس ازاي قدروا بوحشية يضربوه ازاي قدروا يقتلوه ازاي نسوا ان فيه الله الذي يعز ويذل .... لا حول ولا قوة الا بالله للدرجة دي بقينا بعيد عن ديننا وتعاليمة بقت نفوسنا جاهلية بربريه لا ترحم .... الحمد لله انهم مبشرون بأن من لا يرحم لا يُرحم ....
يارب يارب يارب مالنا سواك اللهم اكشف الغمة ....
ايه اللي بيحصل في البلد دي .... اتحداكم حد يجاوب علي سؤالي ..... هي دي بلدنا صاحبة التاريخ والمواقف والريادة !!!!!!!!!!!!! مش ممكن!!!!!
هي دي البلد اللي في حقبة من حقب التاريخ الكل كان بيأتمر بأمرها وينطاع لها والكل بيشورها وينصاع لها .....!!!!!!!!!!!! مش ممكن
ايه اللي وصلنا لكده ... ليه اصبح المصري جوه بلده رخيص ونلوم غيرنا انه بيهينا ويعاملنا كاننا عبيد او اقل درجة ....... مالناش كرامه ولا سعر في بلدنا عاوزين غيرنا ازاي يحترمنا .... هي دي بلد الازهر ...مش ممكن ..... يا بشر بادور علي بلد كان اسمها مصر بلد الامن والامان بلد الريادة والتقدم بلد الحرية والحركات السياسية والنصرة للكل بدور علي الاخت الكبري لكل الدول العربية اللي يلاقيها يقولي مكانها بس مكان معلوم مش علي صفحات التاريخ ....ليه نسيوا مصر 48 وموقفها ومقاتليها في فلسطين ؟ ما همه لازم ينسوا لما يلاقوا المعبر بيتقفل والاطفال بيموتوا والجدار بيتبني لازم ينسوا ... لا مش لازم تنسوا ان مصر هي مصر والفرق في الحكومه والحاكم مش في مصر
مصر نيل وشعب ما اتغيروش ولا ح يتغيروا لكن للاسف احنا بنتحاسب بافعال حكومة وافراد واحنا كلنا مش الحكومه ..... مصر هي مصر في قلبي وقلوب ملايين عايشة وح تفضل مهما اهانونا حكامنا قدام العالم لازم يجي يوم ترجع مصر لانها كانت و حتفضل ارض العروبه ومالناش غير دعوة واحدة
حخسبنا الله ونعم الوكيل فيكم يا اللي عارفين نفسكم كويس
الاشتراك في:
تعليقات الرسالة (Atom)
ليست هناك تعليقات:
إرسال تعليق